كبرنا وحلمي معا

حلم بنت صغيره ..كبرت انا و الحلم هاد عم بكبر معي
بذكر بيوم من الايام لما كنت بصف عاشر زارونا مجموعه شباب نشطاء بدو يسالونا عن احلامنا و وين بنشوف نفسنا بعد عشر سنين و من هالاسئله المعتاده لما اجا الدور علي جاوبت بانه حلمي اضع بصمتي ع وجه الكوكب ..في بنت من الطالبات علقت تعليق سخيف و قالت من كبر اصبعك و بدأو البنات يضحكو و الاستهزائات تنسمع حتى النشطاء صارو يضحكو ع حلمي
هاد الموقف متل كتير مواقف مشابهة كنت اتعرضلها في مدرستي سواء من زميلاتي او معلماتي، بالتالي كل الانتقادات الي كانت تتوجهلي و الاستهزاء كانوا كفيلين بانه يجعلو مني شخص منطوي بلا اصدقاء عشت فتره لا يستهان بها مدمنه ع مواقع التواصل كانت بمثابه مهرب عالم مزيف اصدقاء مزيفين و شخصيه مزيفه
- [ ] فترتها كنت كتير بعييده عن ربنا و علاقتي فيه ما تتعدا سورة الفاتحه في الطابور الصباحي او بعض الصلوات الي كنت اصليهم ع ثقل
ب اخر ٢٠١٤ اول ٢٠١٥ مرة قعدت مع حالي و قلت لمتى يا رغد رح تضلي ع هالحال خلص بكفي قطعت وعد ع نفسي انه بكفي استسلام و انطواء اول خطوة عملتها كانت انه لغيت مواقع التواصل الاجتماعي خاصة الفيس بوك الي بعتبر وقتها كان عدو النجاح و صرت اتقرب من ربنا اكتر و اكتر و التزمت بالصلاه و القران و علاقتي بربنا صارت اقوا بكتير
بديت اشتغل ع حالي اكتر و اكتر بدت شخصيه رغد تتكون و تتمحور و اهدافي توضح ما عادت رغد هي الي بتسمع ل راي الناس فيها و كل همها ترضيهم مش لانه الهدف رضاهم بس لانه هي كانت محتاجه ل صديق
واحد ع الاقل
رغد بدت تستمد قوتها من ربنا الي كانت موقنه انه ما رح يخدلها بيوم من الايام و رح يحققلها امنيتها و دعواتها
بدت تقرأ كتب اكتر تقضي وقتها ع اليوتيوب تحضر مقاطع ملمهمة لاشخاص ناجحين
بدت تنمي موهبتها الي هجرتها و اهملتها بدت تحقق حلم البنت الصغيره الي كانت دايما تخربش رسومات حلوة
بدت تستغل كل وقت عندها تتعلم لغه ثقافه خدعه اي اشي صارت متعطشه جدا للمعلومات بتحب تعرف عن كل شي الشخصيات الفلسفه النجوم و غيره و تحاول تطبق الامور الي بتقدر عليها و تجرب
فعليا رغد كانت بتبني شخصيتها بتكون حالها
و فعلا بدا يكونلي مبادئ خاصه في افكار و وجهات نظر عن امور معينه صرت ارجع لشخصيتي القديمه اشوف الاشياء الحلوة والصحيحة و اتمسك فيها و السلبيات اتركها
ب نص ٢٠١٥ تقريبا التحقت بدوره اخدت فيها اساسيات للرسم استفدت منها جدا
كانت بداية جميلة كتير و سنة ٢٠١٦ كانت حاملة معها امور اجمل
كل الي صارلي ب المدرسه السابقه خلاني بالثانويه انتقل ل مدرسة اخرى لانه ما كان باستطاعتي اني اواجه نفس الوجوه المحبطه الي كانت السبب الاول في تدمير شخصيتي خاصه اني لسا كنت بمرحلة بناء شخصيه ف مش بحاجة ل اشخاص يهدموا الي وصلتله
كنت اتمسك بكل الاشخاص الي بكنولي مشاعر طيبه و احيط نفسي باشخاص ايجابين و داعمين قدر المستطاع
رغم انه انتقالي ل المدرسه الجديدة ما كان بالحسبان الا انها كانت فعليا من اجمل الامور الي صارت الي
بالمدرسه هاي تعرفت ع اصدقاء متاكده رح يكونو اصدقاء العمر اشخاص قلوبهم بيضا بحبوني و بدعموني
كل ما كنت اضعف او احبط و احس كل شي موقف بوجهي بتعرفو شو بحب اعمل
اتفرج ع النجوم و ع السما بعتبرهم هدية من الله الي عندي جملة بحبها كتير هي "يضيئون لأجلي "
كل ما اياس برفع راسي لفوق و بخاطب ربنا و بحس دايما انه بقلي انا عندي خطه افضل الك بس اصبري شوي ربنا الي قادر يضيء الاف النجوم و يحافظ ع توازن الكون قادر ع يأسي و قادر يحقق حلمي
بعد سنة من التمرين المستمر رسمي صار يتطور اكتر و اكتر بديت يتكون الي حياة اجتماعيه اشارك بمعارض احضر فعاليات اشارك بمسابقات اجتماعات فنيه ورشات عمل
انشات صفحة انستغرام وصرت انزل عليها رسوماتي و بداو الناس يتابعوني و يشجعوني و بعد فتره عملت صفحة فيس بوك لكن هالمره بعد ما كان ملهي عن حلمي صار وسيله لاحقق هاد الحلم
بدا حلمي يكبر و يكبر و يلامس النجوم
دخلت عالم المكياج السينمائي عن طريق اليوتيوب وجدت نفسي في هذا المجال ف صرت ابدع و اغوص في هذا العالم و وجدت الدعم الكبير من الالاف المتابعين بل الملايين من الناس
حب رغد للاكتشاف خلاها تضل ورا الحلم بالرغم من عدم وجود مواد اله و استهجان العالم اله
انا صممت و تحديت و قدرت و عملت و هاد كله خلاني اصير بينكم اليوم و احكيلكم قصتي
في موقف كان الفرق بين مدرستين انه في احد المدارس لما كنت بعمل تطبيق صغير من موهبتي رده فعل المعلمات ما كان ايجابي و سحبوا المواد الفنيه مني بينما مدرسه اخرى و هي الي بقدر اطلق عليها مدرسه تحقيق الحلم قدرت هذه الموهبه و عرفت تستغل قدرات طلابها كان اول تصرف لهم لما شافو الموهبه خلوني اعرض عرض مباشر قدام مدير التربيه و التعليم كانوا دايما يشجعوني و كل ما يصير شي جديد او اعلان فني يخبروني و اول خبر نشر عني كان بعد فضل الله بفضل المس عبير قنيبي الي تواصلتلي مع الصحافه "طبعا هي اول تقرير عني كان لجريده الحال" من هون بدا اسمي ينعرف.. بعد ما جهز التقرير تواصلت مع عده جهات و بعتت الهم التقرير بعتت التقرير برساله ل موقع معين و نمت صحيت الصبح و امي بتناديني رغد قومي كل المواقع اعده بتنشر عنك فتحت صفحتي الفيس بوك و كان في كمية كبيره من الرسائل من صحافه و قنوات و اذاعات عالميه و محلية
الاشي كان صدمه كبيرة ما توقعت ابدا انه هالشي يصير و طبعا رده الفعل اقلها كانت الصراخ و النطنطه
بدت رسائل الصحفيين كل يوم تزيد و اللقاءات و الدعوات و الاستضافات بالجامعات و المراكز و الندوات
صارت الناس تعرفني في الشارع في المدارس في الجامعات اسم رغد و فنها بدا يصير معروف و عندي متابعيني الي كلي فخر فيهم و الي هم جزء كبير في الي وصلتله لهلا
كنت بقمة سعادتي رغد بدت تحقق احلامها و فنها يوصل للعالم و بدت ترسم بصمتها الي في يوم من الايام رح تكون موجودة بهاد العالم بصمتها الي كانت تحلم فيها من الصغر
و باخر حديثي بحب قلكم ما ترضوا انكم تكونوا اشخاص اعتياديين كل انسان ناجح اله قصه فشل كل ما اشعر اني فشلت بهدف من اهدافي او انه الطرق بتسكر بوجهي و اشعر انه خلص لازم استسلم بتذكر انه كل انسان ناجح وراه قصه فشل و طريق مليانه عقبات ما رح اقدر اصل للنجاح الي بحلم فيه بدون ما اقع و افشل و اخطأ ازرع حلمك تحصده و تصل به الى المعجزات كل شخص فينا في جواه طاقه ابداعيه مخبيه وانت وحدك تستطيع اطلاقها لانك تقدر امن بنفسك و رفقا بهذه الروح فالله لم يهبك اياها لتسمح للناس ان يخدشوها